Artículu espublizáu nel añu 2006 nel Anuariu de la Música Asturiana
El periodismu, el cine, la radio, la lliteratura o la televisión, por poner unos exemplos, son canales de comunicación que nun tán viviendo’l so meyor momentu de llibertá y variedá creativa. La censura, la búsqueda de la rentabilidá económica como únicu fin, o la so manipulación son dalgunes de les acciones responsables d’esti porcesu de domesticación cultural Esti fenómenu asocede d’una manera mui clara na música, onde una chapladora dirixida por una mano invisible que vemos toos pule los cantos de too aquello que pueda nun entrar pela canal premarcada. Y nesti sen, nun solo falamos d’una censura idelóxica, eliminando determinaes cuestiones polítiques y idelóxiques que nun pueden apaecer nes lletres de los cantares, sinón tamién de la música en si. Y ello ye que se quita a la sociedá, o polo menos nun se-y pon nada fácil, d’allegase a estilos musicales diferentes, innovadores o tradicionales, faciendo qu’ésta vaya perdiendo la so capacidá crítica musical, al nun tener referentes musicales distintos colos qu’iguar una percepción personal con bayura de matices y gustos.
Con too y con ello, tol mundu puede identificar ciertes corrientes musicales que por tradición o obligación convirtiéronse n’abellugu pa tocar o dicir coses diferentes. Ún d’esos estilos agora mesmo n’Asturies ye l’Hip Hop, y lo ye sobretoo porque lo más del rap n’Asturies revelóse como un megafonu pel que protestar, revindicar y intentar dar voz a dalgunos d’esos temes que queden fuera de la versión oficial musical. Nesti artículu vamos intentar echar una gueyada rápida al fenómenu del hip hop n’Asturies.
Pa facer un pequeñu y aceleráu cursu de que ye’l hip hop n’Asturies hai que dar un reblagu p’atrás nel tiempu, y caleyar peles cais de Nueva York nos años 70. Ehí y daquella entamen a dase y a espoxigar varies actividaes artístiques que col tiempu van xunise y iguar los cuatro pegollos que definen al movimientu Hip Hop. Estos son, a saber, el Rap, la música del Hip Hop, formáu a su vez por dos elementos principales que son el MC (Master of Ceremony) responsable de les rimes y el DJ (Disc Kjockey), que pon les bases musicales pa eses rimes, el Break Dance, el baille característicu del Hip Hop tamién conocíu por b-boying, el Graffiti, la espresión gráfica coles pintures nes cais de les ciudaes y el Turntablism o Djing, la mezcla de música usando los platos per aciu del DJ. Toos estos elementos tuvieron dende’l so entamu arreyaos a la cultura urbana de sectores marxinaos, y en dalgunes ocasiones, con movimientos revindicativos. Y ye que ye na periferia de Nueva York onde entamen a vese les primeres pintaes nes paredes de vagones de metro, o fiestes onde los MC entreteníen al públicu faciendo rimes sobre la música que pinchaba’l Dj. Asina nacía’l Hip Hop que 30 años más tarde ye una realidá nes cais d’Asturies.
Y llegó a Asturies porque la cultura del Hip Hop foi adulces creciendo nos Estaos Uníos hasta que, como suel pasar con tantes coses de la cultura americana contemporanea (pa bien y pa mal), entamó a buscar tierres nueves que conquistar. Ello ye qu’ a mediaos de los años 80 entama a llegar a Asturies la onda espansiva del Hip Hop, en forma principalmente d’estilu de baille llamáu Break Dance. Nun ye difícil recordar como, por poner un casu en Xixón, podíen vese nos parques o nel patiu l’Institutu a adolescentes retorcigañándose nun baille estrañu cola música que sonoba en películes como "Beat Street" (84) o "Breakdance" (84). Un tiempu más tarde, anque con menos fuercia, entamen a vese pel Estáu español les primeres amueses de los otros pegollos del Hip Hop, el graffiti , el rap y el Turntablism o Djing. Nesti sen, aplicando un paralelismu col casu de la influyencia americana, Madrid conviértese nel Estáu español nel sitiu de referencia de la cultura Hip Hop, y afítase como’l llugar que va marcar el ritmu nos primeros años de la evolución del Hip Hop. Asina Asturies naquellos años ye una espectadora de lo que ta pasando en llugares como Madrid, anque como los estudiantes bonos, van tomándose apuntes.
El casu ye que la xente averada al mundu del hip hop nun se conformó, como yera d’esperar, con baillar, y bien llueu entamaron a surdir per Madrid y otres grandes ciudaes grupos de rap, que cantaben a lo primero n’inglés y más tarde en castellanu. Ye interesante observar como’l rap en castellanu tuvo que valtar dalgunos prexuicios llingüísticos, ya qu’aquella yera una música qu’hasta esi momentu sentíase namás que n’inglés, y pa muncha xente yera bien raro sentir eses rimes y esi ritmu na llingua española. Con too y con ello, nun pasó muncho tiempu en qu’esta primer rocea se diliera, y a últimos de los años ochenta entamen a salir los primeros discos de grupos españoles d’Hip Hop cantando en castellanu. Ver como l’español tuvo qu’enfrentase a un prexuiciu llingüísiticu al entamar a usase nun campu nel que nunca nun tuviere, recuérdanos ensin remediu la situación de la llingua asturiana, que tantes vegaes tien qu’enfrentase a esos prexuicios nel so supuestu procesu de normalización. De toes maneres, n’Asturies ta dándose un tercer pasu llingüísticu, y yá hai dellos grupos que faen el so rap n’asturianu de los que falaremos más p’alantre.
Pasa’l tiempu y nos años noventa, con una escena hip hop que yá entama a madurar, entamen a salir grupos per dayuri, y Asturies nun quedó fuera d’esi procesu. Como nós diz dalgún de los cantantes de rap entrevistaos pa esti artículu, daquella escuchábanse a los grupos americanos y a los españoles, y nun pasó muncho tiempu pa que la xente entamara a reunise pa baillar, rapear, pintar o simplemente sentir música en locales d’asociaciones culturales o en plena cai, siendo Avilés la ciudá qu’acoyó les más d’estes primeres manifestaciones del Hip Hop n’Asturies. Esta xente entama a crear la base de lo que podemos conocer güei como la escena de hip hop d’Asturies, que como suel pasar en tantos otros estilos, da los sos primeros pasos d’una manera casera y inesperta. Estos alcuentros informales d’aficionaos al Hip Hop van creando grupos que permiten que na actualidá haya n’Asturies un mui bon nivel de raperos, cantera que supo aprovechar les distintes circuntancies, por exemplu’l fenómenu Eminem o SFDK, que ficieron que l’Hip Hop pasara, nos últimos años, al primer planu musical n’Asturies y nel Estáu español. Esti tirón o emburrión de la música hip hop vien dándose nel Estáu español dende va unos años, pero n’Asturies podemos dicir que nos últimos 3 años ye cuando más se notó, faciendo que muncho grupos puedan dicir equí tamos y esti ye’l nuestru momentu. Que característiques definen al hip hop n’Asturies ye lo que vamos intentar aldovinar nes siguientes llinies.
Como fenómenu musical que ye’l Hip Hop, lo que se fai n’Asturies evidentemente sigue unes pautes comunes que se cumplen en tolos llaos onde se rapea, pero si se pueden ver y sentir dalgunos matices que lu caractericen. Primero de nada, l’Hip Hop n’Asturies sigue calteniendo un esencia claramente urbana, distiguiéndose dos bloques o ñeros de Hip Hop n’Asturies. Per un llau tán les cuenques (Nalón y Caudal) con una montonera de grupos como Aktibistaz, Testimoniu la Viztima, los desaparecíos Stoned Atmosphere, Buddah, K-Nalón, Volvone Productions ó 13 Palabras. L’otru focu de mayor importancia d’Hip Hop n’Asturies ye Xixón, que tamién desenvolvió un estilu particular de la mano de grupos como LOR (Lado Oscuro de la Rima), Lego my Ego, "EduakapenN 1", "Null Handicap", Remote Source, …etc. Dellos raperos coinciden en que n’otros llugares como Avilés y Uviéu, onde con dalgo más retrasu, van apaeciendo tamién grupos que busquen facese un nome nel Hip Hop d’Asturies.
Esmigayando un poco como ye’l rap autoctonu podemos ver como ye na cuenca onde los grupos asturianos garrarron na temática de les lletres un componente más identitariu cola so realidá social. Y ye que’l rap normalmente nun escaez onde naz y conviértese munches vegaes nuna atalaya dende la qu’echar una gueyada a la realidá social d’un llugar. Nesti sen podemos ver como en munches lletres de los grupos de les cuenques repítense dellos temes rellacionaos cola crisis económica, industrial y social que viven les zones mineres asturianes. Les prexubilaciones como anestesia social qu’espurre un nivel de vida ensin base pa un futuru, la falta d’espectativa llaboral o los problemes coles drogues son cuestiones que definen dacuando les lletres de los grupos de les cuenques. Y esto ye asina porque l’Hip Hop ye na so esencia una música que naz, de mano, en zones marxinales qu’usen esta ferramienta artística pa quesaxe, protestar o simplemente facese ver y escuchar.
N’otres zones, como en Xixón principalmente, los grupos tán tirando per unes temátiques nes sos lletres más comunes o habituales nos grupos de hip hop d’otros llaos, como ye falar de los cuatro elementos del hip hop (Rap, Break Dance, Graffiti y el Turntablism o Djing ) y de lo que signifiquen pa ellos. Amás d’ello, tamién hai muncha autoafirmación como persona, como MC o como grupu, y en dalgunos casos revindicando’l so barriu como espaciu nel que viven y consideren como propiu. D’esta forma la zona de Xixón avérase más al estilu marcáu polo grupos madrileños y americanos, que siguen siendo’l referente. Con too y con ello nun se puede dicir que los grupos xixoneses escaezan la crítica social, y tolos discos tán chiscaos de referencies a problemátiques qu’afecten sobre too a la mocedá, y qu’enantes conseñábemos cuando falabamos del rap na cuenca. Pa finar hai dellos grupos, y polo que se ve cada vez más, qu’apuesten per un llinia de corte más Gangsta, sub-xéneru del rap nel que les lletres dan más importancia a les historias de gángsters y drogues ensin un mensaxe social constructivu y les más de les vegaes bastante llonxe de la realidá d’Asturies. Arriendes d’ello , nesta manera de facer rap hai munches vegaes una intención clara d’asonsañar la estética y l’estilu de grupos américanos onde la ostentación económica (coches caros, cases grandes y munches xoyes) son la principal carta de presentación.
Y ye qu’anque l’Hip Hop tien, y más que va tener, una canal comercial, en xeneral los más de los grupos n’Asturies viven desenvolviendo’l so trabayu per aciu de canales independientes. Asina son pocos los grupos que tengan discos espublizaos, digamos oficialmente, lo que se diz con un casa de discos y grabáu nun estudiu. Les más de les bandes de rap graben les sos maquetes d’una manera casera y distribúyenles al traviés de la rede d’internet. Con too y con ello, les grabaciones caseres y l’autodistribución pela rede nun son daqué negativu pa munchos hiphoperos, ya que permiten a los grupos nun depender de nenguna discográfica o productora que los pudiera censurar, dándo-yos una llibertá que perderíen irremediablemente al roblar un contratu con dalguna casa de discos de corte comercial. D’esta manera n’internet podemos topar una gran cantidá de maquetes de grupos asturianos en páxines web (http://www.k-nalon.com/, http://www.4x4hiphop.com/, http://www.activohiphop.com/) o nes redes Peer to Peer. Un exemplu de la gran capacidá de difusión d’internet foi’l casu d’ún de los grupos más importantes d’hip hop n’Asturies nos últimos años, Stoned Atmosphere. Esti grupu, orixinariu de la cuenca’l Nalón punxo les sos maquestes a descargar na rede, concretamente les trés primeres producciones, Issue 1, Issue 2 y Issue 3. El casu ye qu’esta última convirtióse nuna auténtica revelación, y en poco tiempu sumó más de 50.000 descargues convirtiendo a Stoned Atmosphere en referente del rap n’Asturies, cuestión que los ayudó a grabar el so siguiente discu, l’Issue4, yá con una discográfica (Three Points). Otru exemplu de cómo Hip Hop aprovecha Internet pa dexase ver ye’l cantar “Un asturiano en Madrid”, tema del que se puede considerar el nome más conocío del rap n’Asturies, Dark la eMe. Esti cantar garra descaradamente y ensin prexuicios la base del tema "Englishman in New York" de Sting pa resumir les vivencies y el xeitu de ver les coses de los asturianos de la "quinta del ALSA" que trabayen na capital del Reinu. Adulces, y gracies a que s’espardió pela rede en milenta webs y foros, esti cantar de rap convirtióse nel himnu de muchos emigrantes asturianos conocíos como lleendes urbanes. Per otru llau, esti componente d’autoxestión que se da ente los que crean rap n’Asturies tamién se da ente los que lu escuchen. Ello ye que malpenes hai chigres n’Asturies onde se pueda sentir Hip Hop, lo qu’obliga a los sos aficionaos a axuntase en locales alquilaos, non solo pa sentir música, sinón tamién rapear, facer Turntablism o baillar break.
Sicasí, anque la mayoría del rap n’Asturies sigue moviéndose per fuera de los canales comerciales, de va trés años p’acá hebo n’Asturies una pequeña revolución que visualizó’l rap y que fizo que toos aquellos que siguen l’actualidá de la música asturiana torcieren la cabeza pa fixase nel Hip Hop asturianu. Como deciemos enantes, los dos principales responsables d’esta revolución fueron l’exitu de Dark la eMe col so “Asturiano en Madrid” y l’impactu que tuvo l’Issue 3 de Stoned Atmosphere. Asina, estos fenómenos sirvieron pa que se diere a conocer too un mundu de grupos que lleven tiempu abondo pidiendo una opotunidá, asina que como se suel dicir, con Stoned y Dark namás qu’aprució’l cume l’iceberg.
Faciendo un repás a que nomes igüen la escena Hip Hop n’Asturies topámonos con grupos nes cuenques como Testimoniu la Viztima, qu’usa un amiestu d’asturianu y castellanu nes sos lletres o K-Nalón, qu’usen esclusivamente la llingua asturiana y que yá tien delles maquetes grabaes, arriendes de tar a piques d’espublizar el so primer discu. Na cuenca’l Nalón tamién tenemos a Arma X, el que yera’l cantante de Stoned Atmosphere y qu’entamó una carrera en solitario tres de que se diliere Stoned y que presentó esti mes de payares el so discu cola mesma casa de discos cola qu’espublizó l’Issue 4 de Stoned Atmosphere, Three Points. Otros grupos con maquetes grabaes, que colos anteriores tán organizaos nel colectivu Kuenka Maphia, son 13 Palabras, Buddah, Smoke&sounds y Ki2. Fuera de lo que ye esti colectivu podemos topar un grupu importante n’Asturies como ye Aktibistaz, qu’aparte de maquetes tien un discu espublizáu, “Tiempos de Guerra”, editáu en 2005 pola discográfica Fünkdamental. Nes cuenques tamién tenemos al enantes mecionáu Mario Fueyo, más conocíu pol so nome de guerra Dark la eMe, que como deciemos fízose famosu col so “Asturiano en Madrid”, y que yá tien dos discos nel so haber, “Esto no va a salir en vinilo” editáu en 2004 y “Chigre y Dragón” que salió a la cai en 2006. Amás Mario Fueyo tamién desenvuelve un importante trabayu de productor colllaborabando con otros grupos como LOR o’l propiu Arma X.
En Xixón, l’otru focu importante d’Asturies, topamos a bandes como los mentaos LOR (Llau escuru de la rima) con dos discos editaos, nel 2002 "Street Opera" y “Fuego” en 2005 y en preparación d’un terceru. De Xixón tamién son "Null Handicap" con discu nes tiendes dende 2005 y entituláu “Zero”. Xixonés tamién ye una de les propuestes más innovadores de la escena Hip Hop n’Asturies, Lego my Ego, qu’espublizaron esta seronda’l so primer discu “Ritmos Suaves, sonidos gordos”. En Xixón, ensin trabayu discográficu pero con maquetes, hai munchos más grupos como "EduakapenN 1", artista con base nel barriu de Contrueces y componente amás d'otra de les bandes de la ciudá xixonesa, "CTS". Otramanera "EduakapenN 1" ye tamién el productor de "Titanes", grupu de Xixón que nel 2003 espublizaron la so primer referencia "Trámites sin cumplir" pa sacar sacar depués en 2004, col sofitu de "EduakapenN 1", la so segunda grabación "Por lo que tu y yo sabemos". D’Avilés hai que mencionar un nome importante na hestoria de la evolución del Hip Hop n’Asturies, Dani Stylo. Esti avilesín vivió dende’l primer momentu’l nacimientu y espoxigue del Hip Hop n’Asturies, bien como b-boy, dj o mc en varios grupos. N’actualidá desenvuelve más un trabayu de productor pa otres bandes, anque nun escaez les otres facetes. Amás a Dani Stylo hai que-y reconocer que foi una de les primeres persones que grabó un rap n’asturianu col “Si España qu’españe”, incluyíu nel compilatoriu editáu por discos L’Aguañaz “L’Asturianu Muévese”. N’Avilés tamién hai grupos que tán dexándose ver como “KMB” con trés maquetes o “KSS”. N’Uviéu, llugar en plenu procesu d’espoxigue de la so escena hip hop rescamplen nomes como “Bubby”, “Rpd”, “4b theory” “Milan City ”o “De la Fuente”.
Toos estos nomes y otros que nun se mecionen equí son la base que permitió que de va trés años p’acá l’Hip Hop seya noticia n’Asturies. Referencies a esti movimientu na prensa especializada y non especializada, discos espublizaos, jams per toa Asturies y conciertos pal gran públicu como la nueche d’Hip Hop qu’entama’l Conceyu d’Uviéu, son los sintomes d’un movimientu musical que como acabamos de ver llevaba tiempu cociéndose, y que nesi procesu foi quien crear distintes escueles o estilos dientro del propiu Hip Hop asturianu. Tamién foi posible que se formaren un garrapiellu de grupos que faen les sos lletres n’asturianu, arriendes d’algamar que dellos nomes garren daqué de fama dientro y fuera d’Asturies. Sicasí queda por ver si esti estilu musical va ser quien a afitase n’Asturies, con unos grupos, un públicu y una industria musical al llau d’ella que-y permita resistir al pasu de la moda, enriqueciendo d’esta mena la bayura musical d’Asturies. Una gran variedá de grupos y estilos musicales ye daqué bien interesante pa la salú cultural de cualesquier sitiu, porque dalguna manera puña pa resistir énte una tendencia xeneral de vaciar de conteníu y domesticar les espresiones artístiques de tou tipu.
El periodismu, el cine, la radio, la lliteratura o la televisión, por poner unos exemplos, son canales de comunicación que nun tán viviendo’l so meyor momentu de llibertá y variedá creativa. La censura, la búsqueda de la rentabilidá económica como únicu fin, o la so manipulación son dalgunes de les acciones responsables d’esti porcesu de domesticación cultural Esti fenómenu asocede d’una manera mui clara na música, onde una chapladora dirixida por una mano invisible que vemos toos pule los cantos de too aquello que pueda nun entrar pela canal premarcada. Y nesti sen, nun solo falamos d’una censura idelóxica, eliminando determinaes cuestiones polítiques y idelóxiques que nun pueden apaecer nes lletres de los cantares, sinón tamién de la música en si. Y ello ye que se quita a la sociedá, o polo menos nun se-y pon nada fácil, d’allegase a estilos musicales diferentes, innovadores o tradicionales, faciendo qu’ésta vaya perdiendo la so capacidá crítica musical, al nun tener referentes musicales distintos colos qu’iguar una percepción personal con bayura de matices y gustos.
Con too y con ello, tol mundu puede identificar ciertes corrientes musicales que por tradición o obligación convirtiéronse n’abellugu pa tocar o dicir coses diferentes. Ún d’esos estilos agora mesmo n’Asturies ye l’Hip Hop, y lo ye sobretoo porque lo más del rap n’Asturies revelóse como un megafonu pel que protestar, revindicar y intentar dar voz a dalgunos d’esos temes que queden fuera de la versión oficial musical. Nesti artículu vamos intentar echar una gueyada rápida al fenómenu del hip hop n’Asturies.
Pa facer un pequeñu y aceleráu cursu de que ye’l hip hop n’Asturies hai que dar un reblagu p’atrás nel tiempu, y caleyar peles cais de Nueva York nos años 70. Ehí y daquella entamen a dase y a espoxigar varies actividaes artístiques que col tiempu van xunise y iguar los cuatro pegollos que definen al movimientu Hip Hop. Estos son, a saber, el Rap, la música del Hip Hop, formáu a su vez por dos elementos principales que son el MC (Master of Ceremony) responsable de les rimes y el DJ (Disc Kjockey), que pon les bases musicales pa eses rimes, el Break Dance, el baille característicu del Hip Hop tamién conocíu por b-boying, el Graffiti, la espresión gráfica coles pintures nes cais de les ciudaes y el Turntablism o Djing, la mezcla de música usando los platos per aciu del DJ. Toos estos elementos tuvieron dende’l so entamu arreyaos a la cultura urbana de sectores marxinaos, y en dalgunes ocasiones, con movimientos revindicativos. Y ye que ye na periferia de Nueva York onde entamen a vese les primeres pintaes nes paredes de vagones de metro, o fiestes onde los MC entreteníen al públicu faciendo rimes sobre la música que pinchaba’l Dj. Asina nacía’l Hip Hop que 30 años más tarde ye una realidá nes cais d’Asturies.
Y llegó a Asturies porque la cultura del Hip Hop foi adulces creciendo nos Estaos Uníos hasta que, como suel pasar con tantes coses de la cultura americana contemporanea (pa bien y pa mal), entamó a buscar tierres nueves que conquistar. Ello ye qu’ a mediaos de los años 80 entama a llegar a Asturies la onda espansiva del Hip Hop, en forma principalmente d’estilu de baille llamáu Break Dance. Nun ye difícil recordar como, por poner un casu en Xixón, podíen vese nos parques o nel patiu l’Institutu a adolescentes retorcigañándose nun baille estrañu cola música que sonoba en películes como "Beat Street" (84) o "Breakdance" (84). Un tiempu más tarde, anque con menos fuercia, entamen a vese pel Estáu español les primeres amueses de los otros pegollos del Hip Hop, el graffiti , el rap y el Turntablism o Djing. Nesti sen, aplicando un paralelismu col casu de la influyencia americana, Madrid conviértese nel Estáu español nel sitiu de referencia de la cultura Hip Hop, y afítase como’l llugar que va marcar el ritmu nos primeros años de la evolución del Hip Hop. Asina Asturies naquellos años ye una espectadora de lo que ta pasando en llugares como Madrid, anque como los estudiantes bonos, van tomándose apuntes.
El casu ye que la xente averada al mundu del hip hop nun se conformó, como yera d’esperar, con baillar, y bien llueu entamaron a surdir per Madrid y otres grandes ciudaes grupos de rap, que cantaben a lo primero n’inglés y más tarde en castellanu. Ye interesante observar como’l rap en castellanu tuvo que valtar dalgunos prexuicios llingüísticos, ya qu’aquella yera una música qu’hasta esi momentu sentíase namás que n’inglés, y pa muncha xente yera bien raro sentir eses rimes y esi ritmu na llingua española. Con too y con ello, nun pasó muncho tiempu en qu’esta primer rocea se diliera, y a últimos de los años ochenta entamen a salir los primeros discos de grupos españoles d’Hip Hop cantando en castellanu. Ver como l’español tuvo qu’enfrentase a un prexuiciu llingüísiticu al entamar a usase nun campu nel que nunca nun tuviere, recuérdanos ensin remediu la situación de la llingua asturiana, que tantes vegaes tien qu’enfrentase a esos prexuicios nel so supuestu procesu de normalización. De toes maneres, n’Asturies ta dándose un tercer pasu llingüísticu, y yá hai dellos grupos que faen el so rap n’asturianu de los que falaremos más p’alantre.
Pasa’l tiempu y nos años noventa, con una escena hip hop que yá entama a madurar, entamen a salir grupos per dayuri, y Asturies nun quedó fuera d’esi procesu. Como nós diz dalgún de los cantantes de rap entrevistaos pa esti artículu, daquella escuchábanse a los grupos americanos y a los españoles, y nun pasó muncho tiempu pa que la xente entamara a reunise pa baillar, rapear, pintar o simplemente sentir música en locales d’asociaciones culturales o en plena cai, siendo Avilés la ciudá qu’acoyó les más d’estes primeres manifestaciones del Hip Hop n’Asturies. Esta xente entama a crear la base de lo que podemos conocer güei como la escena de hip hop d’Asturies, que como suel pasar en tantos otros estilos, da los sos primeros pasos d’una manera casera y inesperta. Estos alcuentros informales d’aficionaos al Hip Hop van creando grupos que permiten que na actualidá haya n’Asturies un mui bon nivel de raperos, cantera que supo aprovechar les distintes circuntancies, por exemplu’l fenómenu Eminem o SFDK, que ficieron que l’Hip Hop pasara, nos últimos años, al primer planu musical n’Asturies y nel Estáu español. Esti tirón o emburrión de la música hip hop vien dándose nel Estáu español dende va unos años, pero n’Asturies podemos dicir que nos últimos 3 años ye cuando más se notó, faciendo que muncho grupos puedan dicir equí tamos y esti ye’l nuestru momentu. Que característiques definen al hip hop n’Asturies ye lo que vamos intentar aldovinar nes siguientes llinies.
Como fenómenu musical que ye’l Hip Hop, lo que se fai n’Asturies evidentemente sigue unes pautes comunes que se cumplen en tolos llaos onde se rapea, pero si se pueden ver y sentir dalgunos matices que lu caractericen. Primero de nada, l’Hip Hop n’Asturies sigue calteniendo un esencia claramente urbana, distiguiéndose dos bloques o ñeros de Hip Hop n’Asturies. Per un llau tán les cuenques (Nalón y Caudal) con una montonera de grupos como Aktibistaz, Testimoniu la Viztima, los desaparecíos Stoned Atmosphere, Buddah, K-Nalón, Volvone Productions ó 13 Palabras. L’otru focu de mayor importancia d’Hip Hop n’Asturies ye Xixón, que tamién desenvolvió un estilu particular de la mano de grupos como LOR (Lado Oscuro de la Rima), Lego my Ego, "EduakapenN 1", "Null Handicap", Remote Source, …etc. Dellos raperos coinciden en que n’otros llugares como Avilés y Uviéu, onde con dalgo más retrasu, van apaeciendo tamién grupos que busquen facese un nome nel Hip Hop d’Asturies.
Esmigayando un poco como ye’l rap autoctonu podemos ver como ye na cuenca onde los grupos asturianos garrarron na temática de les lletres un componente más identitariu cola so realidá social. Y ye que’l rap normalmente nun escaez onde naz y conviértese munches vegaes nuna atalaya dende la qu’echar una gueyada a la realidá social d’un llugar. Nesti sen podemos ver como en munches lletres de los grupos de les cuenques repítense dellos temes rellacionaos cola crisis económica, industrial y social que viven les zones mineres asturianes. Les prexubilaciones como anestesia social qu’espurre un nivel de vida ensin base pa un futuru, la falta d’espectativa llaboral o los problemes coles drogues son cuestiones que definen dacuando les lletres de los grupos de les cuenques. Y esto ye asina porque l’Hip Hop ye na so esencia una música que naz, de mano, en zones marxinales qu’usen esta ferramienta artística pa quesaxe, protestar o simplemente facese ver y escuchar.
N’otres zones, como en Xixón principalmente, los grupos tán tirando per unes temátiques nes sos lletres más comunes o habituales nos grupos de hip hop d’otros llaos, como ye falar de los cuatro elementos del hip hop (Rap, Break Dance, Graffiti y el Turntablism o Djing ) y de lo que signifiquen pa ellos. Amás d’ello, tamién hai muncha autoafirmación como persona, como MC o como grupu, y en dalgunos casos revindicando’l so barriu como espaciu nel que viven y consideren como propiu. D’esta forma la zona de Xixón avérase más al estilu marcáu polo grupos madrileños y americanos, que siguen siendo’l referente. Con too y con ello nun se puede dicir que los grupos xixoneses escaezan la crítica social, y tolos discos tán chiscaos de referencies a problemátiques qu’afecten sobre too a la mocedá, y qu’enantes conseñábemos cuando falabamos del rap na cuenca. Pa finar hai dellos grupos, y polo que se ve cada vez más, qu’apuesten per un llinia de corte más Gangsta, sub-xéneru del rap nel que les lletres dan más importancia a les historias de gángsters y drogues ensin un mensaxe social constructivu y les más de les vegaes bastante llonxe de la realidá d’Asturies. Arriendes d’ello , nesta manera de facer rap hai munches vegaes una intención clara d’asonsañar la estética y l’estilu de grupos américanos onde la ostentación económica (coches caros, cases grandes y munches xoyes) son la principal carta de presentación.
Y ye qu’anque l’Hip Hop tien, y más que va tener, una canal comercial, en xeneral los más de los grupos n’Asturies viven desenvolviendo’l so trabayu per aciu de canales independientes. Asina son pocos los grupos que tengan discos espublizaos, digamos oficialmente, lo que se diz con un casa de discos y grabáu nun estudiu. Les más de les bandes de rap graben les sos maquetes d’una manera casera y distribúyenles al traviés de la rede d’internet. Con too y con ello, les grabaciones caseres y l’autodistribución pela rede nun son daqué negativu pa munchos hiphoperos, ya que permiten a los grupos nun depender de nenguna discográfica o productora que los pudiera censurar, dándo-yos una llibertá que perderíen irremediablemente al roblar un contratu con dalguna casa de discos de corte comercial. D’esta manera n’internet podemos topar una gran cantidá de maquetes de grupos asturianos en páxines web (http://www.k-nalon.com/, http://www.4x4hiphop.com/, http://www.activohiphop.com/) o nes redes Peer to Peer. Un exemplu de la gran capacidá de difusión d’internet foi’l casu d’ún de los grupos más importantes d’hip hop n’Asturies nos últimos años, Stoned Atmosphere. Esti grupu, orixinariu de la cuenca’l Nalón punxo les sos maquestes a descargar na rede, concretamente les trés primeres producciones, Issue 1, Issue 2 y Issue 3. El casu ye qu’esta última convirtióse nuna auténtica revelación, y en poco tiempu sumó más de 50.000 descargues convirtiendo a Stoned Atmosphere en referente del rap n’Asturies, cuestión que los ayudó a grabar el so siguiente discu, l’Issue4, yá con una discográfica (Three Points). Otru exemplu de cómo Hip Hop aprovecha Internet pa dexase ver ye’l cantar “Un asturiano en Madrid”, tema del que se puede considerar el nome más conocío del rap n’Asturies, Dark la eMe. Esti cantar garra descaradamente y ensin prexuicios la base del tema "Englishman in New York" de Sting pa resumir les vivencies y el xeitu de ver les coses de los asturianos de la "quinta del ALSA" que trabayen na capital del Reinu. Adulces, y gracies a que s’espardió pela rede en milenta webs y foros, esti cantar de rap convirtióse nel himnu de muchos emigrantes asturianos conocíos como lleendes urbanes. Per otru llau, esti componente d’autoxestión que se da ente los que crean rap n’Asturies tamién se da ente los que lu escuchen. Ello ye que malpenes hai chigres n’Asturies onde se pueda sentir Hip Hop, lo qu’obliga a los sos aficionaos a axuntase en locales alquilaos, non solo pa sentir música, sinón tamién rapear, facer Turntablism o baillar break.
Sicasí, anque la mayoría del rap n’Asturies sigue moviéndose per fuera de los canales comerciales, de va trés años p’acá hebo n’Asturies una pequeña revolución que visualizó’l rap y que fizo que toos aquellos que siguen l’actualidá de la música asturiana torcieren la cabeza pa fixase nel Hip Hop asturianu. Como deciemos enantes, los dos principales responsables d’esta revolución fueron l’exitu de Dark la eMe col so “Asturiano en Madrid” y l’impactu que tuvo l’Issue 3 de Stoned Atmosphere. Asina, estos fenómenos sirvieron pa que se diere a conocer too un mundu de grupos que lleven tiempu abondo pidiendo una opotunidá, asina que como se suel dicir, con Stoned y Dark namás qu’aprució’l cume l’iceberg.
Faciendo un repás a que nomes igüen la escena Hip Hop n’Asturies topámonos con grupos nes cuenques como Testimoniu la Viztima, qu’usa un amiestu d’asturianu y castellanu nes sos lletres o K-Nalón, qu’usen esclusivamente la llingua asturiana y que yá tien delles maquetes grabaes, arriendes de tar a piques d’espublizar el so primer discu. Na cuenca’l Nalón tamién tenemos a Arma X, el que yera’l cantante de Stoned Atmosphere y qu’entamó una carrera en solitario tres de que se diliere Stoned y que presentó esti mes de payares el so discu cola mesma casa de discos cola qu’espublizó l’Issue 4 de Stoned Atmosphere, Three Points. Otros grupos con maquetes grabaes, que colos anteriores tán organizaos nel colectivu Kuenka Maphia, son 13 Palabras, Buddah, Smoke&sounds y Ki2. Fuera de lo que ye esti colectivu podemos topar un grupu importante n’Asturies como ye Aktibistaz, qu’aparte de maquetes tien un discu espublizáu, “Tiempos de Guerra”, editáu en 2005 pola discográfica Fünkdamental. Nes cuenques tamién tenemos al enantes mecionáu Mario Fueyo, más conocíu pol so nome de guerra Dark la eMe, que como deciemos fízose famosu col so “Asturiano en Madrid”, y que yá tien dos discos nel so haber, “Esto no va a salir en vinilo” editáu en 2004 y “Chigre y Dragón” que salió a la cai en 2006. Amás Mario Fueyo tamién desenvuelve un importante trabayu de productor colllaborabando con otros grupos como LOR o’l propiu Arma X.
En Xixón, l’otru focu importante d’Asturies, topamos a bandes como los mentaos LOR (Llau escuru de la rima) con dos discos editaos, nel 2002 "Street Opera" y “Fuego” en 2005 y en preparación d’un terceru. De Xixón tamién son "Null Handicap" con discu nes tiendes dende 2005 y entituláu “Zero”. Xixonés tamién ye una de les propuestes más innovadores de la escena Hip Hop n’Asturies, Lego my Ego, qu’espublizaron esta seronda’l so primer discu “Ritmos Suaves, sonidos gordos”. En Xixón, ensin trabayu discográficu pero con maquetes, hai munchos más grupos como "EduakapenN 1", artista con base nel barriu de Contrueces y componente amás d'otra de les bandes de la ciudá xixonesa, "CTS". Otramanera "EduakapenN 1" ye tamién el productor de "Titanes", grupu de Xixón que nel 2003 espublizaron la so primer referencia "Trámites sin cumplir" pa sacar sacar depués en 2004, col sofitu de "EduakapenN 1", la so segunda grabación "Por lo que tu y yo sabemos". D’Avilés hai que mencionar un nome importante na hestoria de la evolución del Hip Hop n’Asturies, Dani Stylo. Esti avilesín vivió dende’l primer momentu’l nacimientu y espoxigue del Hip Hop n’Asturies, bien como b-boy, dj o mc en varios grupos. N’actualidá desenvuelve más un trabayu de productor pa otres bandes, anque nun escaez les otres facetes. Amás a Dani Stylo hai que-y reconocer que foi una de les primeres persones que grabó un rap n’asturianu col “Si España qu’españe”, incluyíu nel compilatoriu editáu por discos L’Aguañaz “L’Asturianu Muévese”. N’Avilés tamién hai grupos que tán dexándose ver como “KMB” con trés maquetes o “KSS”. N’Uviéu, llugar en plenu procesu d’espoxigue de la so escena hip hop rescamplen nomes como “Bubby”, “Rpd”, “4b theory” “Milan City ”o “De la Fuente”.
Toos estos nomes y otros que nun se mecionen equí son la base que permitió que de va trés años p’acá l’Hip Hop seya noticia n’Asturies. Referencies a esti movimientu na prensa especializada y non especializada, discos espublizaos, jams per toa Asturies y conciertos pal gran públicu como la nueche d’Hip Hop qu’entama’l Conceyu d’Uviéu, son los sintomes d’un movimientu musical que como acabamos de ver llevaba tiempu cociéndose, y que nesi procesu foi quien crear distintes escueles o estilos dientro del propiu Hip Hop asturianu. Tamién foi posible que se formaren un garrapiellu de grupos que faen les sos lletres n’asturianu, arriendes d’algamar que dellos nomes garren daqué de fama dientro y fuera d’Asturies. Sicasí queda por ver si esti estilu musical va ser quien a afitase n’Asturies, con unos grupos, un públicu y una industria musical al llau d’ella que-y permita resistir al pasu de la moda, enriqueciendo d’esta mena la bayura musical d’Asturies. Una gran variedá de grupos y estilos musicales ye daqué bien interesante pa la salú cultural de cualesquier sitiu, porque dalguna manera puña pa resistir énte una tendencia xeneral de vaciar de conteníu y domesticar les espresiones artístiques de tou tipu.
No hay comentarios:
Publicar un comentario