El Meyor Gaiteru del Mundu

Esti branu vi per Xixón un cartel que consiguió lo que pretendía, que me llamara l'atención y que parara un segundín a velu. El cartel traia, si nun recuerdo mal, unes lletres blanques en bloque que decíen "El Meyor Gaiteru del Mundu", qu'apaecien como una revelación sobre una semeya del gaiteru escocés Fred Morrison. El cartel daba anuncia de l'actuación del músicu en Candás el día 24 d'agostu nos 'III Alcuentros cola Cultura Tradicional' entamaos por El Grupu de Baille Tradicional San Félix. Toi por asegurar que la organización decidió poner esti tipu de frase nel cartel porque, polo menos a mi sí, ye dalgo que llama l'atención. Namás hai que recordar un cartel de circu poniendo "los cocodrilos más llargos del mundu" o "El Meyor espectáculu de Coches Monstruo del Mundu", ye dicir, como ténica publicitaria nun hai nada que reprochar. Pero, quiero entrugame, qué significáu tien esi "meyor" na música, y por qué nel mundu de la gaita hai esa afición y preocupación competitiva.

Davezu, ente'l públicu o participantes de concursos de gaita, en barres de chigre o mesmamente nos tableros d'anuncies d'esti diariu, discútese con muncha afición sobre "quién ye'l meyor gaiteru". Les frases vuelen con argumentos de cuántes bandes de gaites dirixó ún, en cuantos grupos tocó l'otru, en qué festivales tuvo, y sobre too, cuantos Macallan o concursos del Campoamor ganó. Evidentemente nun s'algama un consensu nunca, dexando los participantes de la conversación la cosa por imposible. Y ye qu'a mi paezme dalgo normal porque ¿cómo se puede midir la calidá artística y musical d'una persona? ¿qué aparatu nos da esa gráfica que callará toles discusiones con un 7.6 contra un 8.4?. Sí, ye verdá qu'hai coses casi oxetives como l'afinación, el ritmu o'l tempo, pero cuando estes trés coses son casi igual de bones, ¿a quién y por qué-y damos el primer puestu nel podium? y sobre too, qué necesidá hai d'ello.


Tengo pa min que cuando la competitividá y l'alarde técnicu ensin xaciu entama a pasar penriba de la música perdemos toos, músicos y espèctadores. Como exemplu, qu'en cierta manera puede aplicase al mundu de la gaita, podemos tener el casu de la trikitixa, el curdión vascu. Va unos años Joseba Tapia, ún de los curdioneros de más nome n'Euskadi ponía un cursu en Grao. Nél contaba, ente otres munches coses, como a lo primero de la so carrera llanzóse a una espiral competiviva onde los dos principales rivales yeren él y Kepa Junquera. Tapia relataba como llegó un momentu nel que taben él y munchos más curdioneros obsesionaos colos distintos concursos, buscando'l Fandango ol'Arín más rápidu y más complicáu pa concursar y ganar, escaeciendo pel camín d'esa carrera la música, convirtiéndose aquello nuna competición de pulsaciones. Nesi momentu Joseba Tapia comenta que se dio cuenta de qu'aquella situación nun tenía muncho sentíu, colo que decidió dexar los concursos y dedicase a investigar y volver a disfrutar de la música. Una situación parecida ye la que creo que se da de xemes en cuando en concursos de gaita n'Asturies, participantes que toquen les mesmes pieces una y otra vuelta cada vez más rápido y con más ornamentación, dexando la imaxinación y la innovación pa meyor ocasión. Y ye que, si dalguna razón de ser podríen tener los concursos, sedría animar a la xente a buscar dalgo orixinal, espresividaes que soprendieren al xuráu y al públicu (anque ye verdá qu'éstos tienen que tar dimpuestos a sentiles), pa que con ello ganara la gaita en cuantes a la variedá estilítica, de repertoriu y d'ornamentación.


Siéntolo, nun sé cuál ye'l meyor gaiteru d'Asturies, por si daquién esperaba que lo dixera, pero lo que sí sé ye qué gaiteros y gaiteres me gusten, dalgunos con una técnica mui avanzada y otros non, pero que son quien a da-y al instrumentu un soníu prestosu, que toquen les pieces de siempre y otres menos conocíes con distintos estilos según la situación -más tradicional o más innovador-, independientemente de cuántos Macallans, Campoamores y demás glories tengan nel so haber. Asina que, nun se trata d'eliminar los concursos, anque nun soi mui amigu d'ellos, pero que polo menos nellos se premie más la orixinalidá buscando pieces asturianes, de composición o tradicionales, qu'amuesen tolo que se puede facer con esti instrumentu, y escaezámonos un poco de quién ye'l "meyor" o'l "pior" y disfrutemos más de la música según como a caún-ý preste. Fred Morrison tien ganaos 7 Macallan - agora Troféu Mac Crimmon- los asturianos José Manuel Tejedor y Rubén Alba tienen trés caún y el gallegu Edelmiro Fernández 4, pa que val que faigamos divisiones de porcentaxes pa sacar quién ye'l meyor, toos son gaiteros de muncha calidá, y a caún va presta-y ún más qu'otru. De los campeonatos de Bandes de Gaites falaremos otru día.