La gaita nel conservatoriu: ¿ye la solución?

El 6 d'abril de 2006 el Conseyu de Gobiernu del Principáu d'Asturies daba'l preste a la la ordenación y currículu de la especialidá de Gaita nos graos elemental y mediu de la enseñanza musical, y a les prebes d'accesu de la especialidá n'Asturies. D'esta manera, per aciu de la regulación del currículu oficial, apurríase-yos a los estudios de gaita'l rangu d'especialidá nel marcu de la normativa vixente pa les enseñances profesionales artístiques. Desque'l 29 de mayu de 2005 el conseyeru d'educación José Luis Iglesias Riopedre diere anuncia de que la gaita diba entrar nos conservatorios, el tema volvía a tar de moda, anque gran parte del colectivu de la gaita vía con escepticismu l'anuncia, ya que la esperiencia dicía que promeses anteriores quedaren pa prau.

Pero'l casu ye que llegó l'alcuerdu de Conseyu de Gobiernu y darréu les prebes pa escoyer a los mayestros gaiteros que pondríen clas en Xixón y Uviéu. Mientres que n'Uviéu ponse clas del grau mediu, pa Xixón quedó namás el grau elemental, decisión que puede calificase de centralista y bastante discutida, ya que Xixón por población y por númberu de músicos de gaita podría agospiar tamién perfectamente la especialidá en grau mediu, evitando asina que los gaiteros y gaiteres xixoneses tengan que desplazase a Uviéu pa desenvolver los sos estudios, y ye que yá que tamos, vamos facer les coses bien.

Con esta inclusión nel conservatoriu puede dar la sensación de que la gaita asturiana algamó'l cume de la ordenación educativa. Que foi quien a entrar no más selecto, oficial y formal del enseñu musical, colo que la xente que tamos alredor de la gaita asturiana podíemos sentinos a gusto y tranquilos porque yá tenemos lo que queríemos. Bien ye verdá que la inclusión de la gaita nel conservatoriu ye una reivindicación de vieyo del mundu de la gaita, y por poner un casu la recién creada XUGA (Xuntanza de Gaiteros Asturianos) trabayó dende que se creo casi n'esclusiva nesta xera. Pero hai qu'entrugase si de verdá'l fechu de que la gaita asturiana tea nel conservatoriu ye verdá un pasu alantre importante pal so enseñu n'Asturies.

Según el propiu conseyeru José Luis Iglesias Riopedre son 1.560 alumnos los qu'estudien gaita na'actualidá n'Asturies, repartíos ente 24 escueles de música, 4 escueles de danza y 30 asociaciones culturales. D'esos 1560 escolinos, solo 30 son los qu'estudien la gaita nel conservatoriu, colo que nun fai falta facer el cálculu pa decatase de que'l porcentaxe d'estudiantes de gaita nel conservatoriu en rellación al total d'escolinos ye bien pequeñu. Ye verdá que l'enseñu de gaita nel conservatoriu ta acabantes d'echar a andar, pero tengo pa min qu'estes cifres nun van ser muncho más grandes n'años próximos, colo qu'esi porcentaxe albidró va siguir siendo pequeñu, sobre too, en comparación col de bandes de gaita, escueles de música de conceyu y asociaciones culturales. Y ye que si echamos una güeyada a Galicia, onde lleven años d'adelantu no que cinca al desarrollu del enseñu de gaita, y vemos los datos del "Libro Branco do ensino na música tradicional en Galicia", veremos que casi la metada de los mayestros de música tradicional obtuvo la so formación gracies a cursos realizaos n'asociaciones culturales, y qu'incluso un 21% parte de la so formación foi autodidacta. Amás el 60% de los centros onde s'imparte clas de música tradicional en Galicia son asociaciones culturales, representando los centros oficiales de música (escueles municipales, centros privaos o autorizaos de música, conservatorios, escueles de la diputación..etc) suponen un ruin 10% Tengo pa min que cualesquier persona que tenga rellación cola gaita n'Asturies puede treslladar estos datos a Asturies, y anque salvando les distancies, esti llibru blancu puede tamién radiografiar de dalguna manera la situación del enseñu de la gaita n'Asturies.

Nun creo que nin a los mayestros nin a los escolinos de gaita n'Asturies se-yos escape que lo más de la xente n'Asturies deprende l'instrumentu asturianu más conocíu n'asociaciones culturales, bien seya en bandes de gaita o escueles de música tradicional ensin más, y que los sos mayestros asina lo ficieron, más que nada porque nun teníen otra posibilidá. Esto quier dicir que son eses entidaes les que tán arrecostinando cola responsabilidá del enseñu y la tresmisión, non solo de la gaita, sinón de la música tradicional. Llegaos a esti puntu ye cuando se puede facer ún la entruga de por qué tantísima preocupación pola inclusión de la gaita asturiana nel conservatoriu, cuando la realidá diznos qu'agora mesmo nun ye onde principalmente habría qu'actuar o preocupase. Podría dicise que la xente deprende gaita nesos sitios porque nunca tuvo la opción d'entrar a un conservatoriu a deprender, pero si miramos otra vuelta a la esperiencia vecina vemos como ellí'l conservatoriu de Vigo entamó les clases de gaita gallega en 1971 y entró nos planes oficiales nel 77, saliendo la primer promoción de grau superior, que n'Asturies nin existe, en 2002. Con too y con ello, a pesar de llevar muncho más tiempu cola gaita nos conservatorios, sigue siendo mayor el porcentaxe de xente qu'escueye otres opciones pa deprender el so instrumentu. Personalmente creo que nun tien qu'estrañanos, porque cuando falamos de gaita falamos de música tradicional, de música popular, qu'en nengún casu ye menos digna que nenguna otra, pero pal enseñu d'esti tipu de música hai que buscar un ambiente y una manera d'enseñar que tien poco que ver col esquema docente d'un conservatoriu. Ye dicir, si queremos atender al interés de los asturianos por deprender gaita asturiana y que lo faigan de la manera en que la mayoría lo demanda, tendríemos qu'escaecenos un poco de los conservatorios y mirar más pa eses entidaes, que como dicía enantes, lleven tiempu abondo asumiendo la responsabilidá educativa de la gaita.

Con too y con ello nun quiero que se m'entienda mal, personalmente toi a favor de que la gaita asturiana tea nel conservatoriu, paezme un pasu alantre y un llogru. La gaita asturiana ye un instrumentu que puede tar perfectamente nestes entidaes, dándo-y la opción a quien quiera y cuando quiera a estudiar esti instrumentu baxo criterios y esquemes de conservatoriu. Pero creo que se sobredimensiona lo relevante d'esti fechu, y preocúpame qu'esti llogru cree una cortina de fumu que nun nos dexe ver el verdaderu problema no que cinca al futuru de la gaita asturiana. Nun podemos permitir que l'alministración asturiana, de quien ye la responsabilidá última de cuidar pola tresmisión y defensa de la cultura asturiana, diga que ya fizo tolo que tenía que facer y que cola gaita nel conservatoriu ella yá fizo'l so trabayu. Eso sedría escaecese d'esa mayoría de persones qu'escueyen otres opciones pa deprender gaita, y nestos momentos tanto los escolinos, como los mayestros, asociaciones culturales, y colectivos -nesti casu faigo referencia especial a la XUGA- nun pueden conformase con una decisión que nun encara los problemes reales de la docencia de gaita. Otru debate ye qu'hai que facer con esi otru ámbitu mayoritariu onde se deprende gaita, asociaciones culturales, bandes de gaita, escueles municipales, pero nun podemos permitir qu'esta siga siendo una enseñanza en munchos casos poco o nada reglada, ensin materiales didacticos curiosos o con mayestros en condiciones llaborales realmente llamentables. Les subvenciones o convenios con eses escueles de música tradicional privaes pueden ser una solución, pero la potenciación de la música tradicional nes escueles municipales ye pa min una de les meyores soluciones. La cercanía que suponen pal alumnáu les escueles municipales, les bones instalaciones de les que puede disponer una escuela municipal y el fechu en si de qu'una alministración pública asuma la responsabilidá de la tresmisión del patrimoniu musical asturianu, son argumentos que creo de pesu.