Folixa na Primavera o Feria d’Abril

D’equí a poco va celebrase la decimotercer edición de la Folixa na Primavera en Mieres. Esti festival ye una bona mezcolanza ente folixa y actividaes divulgatives. La edición d’anguaño vuelve a cumplir coles espectatives, y arriendes d’un programa d’actividaes pa tol fin de selmana, les bandes que van tocar vuelven a llamar l’atención, los asturianos La Bandina y Felpeyu, dos grupos que tán a piques de sacar discu nuevu, y los irlandeses Michael Mcgoldrick Band y Derwish.

En resume, la Folixa Primavera foi un bon apueste por parte del equipu de xestión cultural del Conceyu de Mieres, creando dalgo atractivu al que’l públicu respuende. Pero lo que tol mundu nun sabe ye qu’esta Folixa pudo ser una Feria d’abril, al estilu de la que nos regala tolos años el Conceyu de Piloña. Va como 15 años el Conceyu de Mieres taba buscando una actividá que facer per esti tiempu, y caro, una idega que tenía bien de fuercia, y que diba acordies cola sensibilidá cultural de de cargos públicos y xestores culturales n’Asturies, yera facer una feria d’abril. Pero’l casu ye qu’afortunadamente daquién tuvo un momentu de “lucidez”, y plantegó que por qué nun se facía un festival de música folk, daqué que se podía venceyar muncho meyor cola cultura d’equí. Colo que Folixa na Primavera ye frutu de dalgo de casualidá y suerte.

¿Por qué nun suel ser la primer opción el productu asturianu?. Hai varies razones, pero una importante ye que ye grande’l desconocimientu que tienen muchos responsables culturales de les posibilidaes qu’hai trabayando con productu autoctonu. Inda m’alcuerdo cuando oyí a una persona con responsabilidaes culturales nun Conceyu dicir al ver tocando una gaita y una guitarra xuntos que “taba mui guapo aquello y que siguieren porque nun había nadie que ficiere eso”. La realidá ye qu’aquella persona desconocía dafechu a tolos grupos, discos y conciertos qu’hai. Y ye qu’anque la música asturiana algamó sacar un poco la cabezuca y visualizase un poco más énte la sociedá asturiana, principalmente gracies a fenómenos como Hevia, Anabel Santiago o Tejedor, los productos de la música asturiana siguen siendo les más de les veces unos grandes desconocíos pa la sociedá asturiana.

Sí, sáquense munchos discos, la rellación población númberu de discos espublizaos al añu ye perbona, pero munches d’eses producciones queden casi inédites, ocultes pa la mayoría de la xente. Esa falta de visualización del productu musical asturianu tien varies razones, lo feble de la industria musical asturiana, lo amauter de los más de los músicos, la falta de rodaxe y profesionales nel management, pero sobre too, el poco interés del gobiernu asturianu por esta parte de la cultura asturiana, y como consecuencia, la poca inversión que descapitaliza cualesquier proyectu que se desarrolle. Y nun val l’argumentu de que se dan subvenciones a la edición de discos n’asturianu, porque la cantidá ye de risa. Namás qu’una comparación pequeña pa que se vea de lo que falo. L’añu pasáu’l Principáu destinó 45.000 euros d’ayudes pa producción discográfica, mientres que, por poner un casu, la cabalgata de Reis del Conceyu d’Uviéu tien un presupuestu de 116.000 euros, o’l presupuestu añal de la OSPA (Orquesta Sinfónica del Pirncipado de Asturias) ye de 4.940.100 euros, y ya nun quiero tocar el tema del presupuestu de La Laboral.

Asina mal vamos, la llucha por facese un espaciu dientro del mercáu cultural que vivimos nel sieglu XXI desixe una apueste claro, tanto ideolóxicu (creese que la música asturiana puede y tien que pintar daqué nel mundu), como económicu (dotar los actores de la industria musical asturiana de los medios necesarios pa poder competir). Ensín una inversión curiosa y una política cultural afechisca poco se va poder facer, y aún con estes premises el futuru nun ta aseguráu como se puede ver nos Paisos Catalans. Nun informe ellaboráu pola Fundació Audiències de la Comunicació i la Cultura (FUNDACC) llamáu “La dieta mediàtica i cultural dels joves”, qu’estudia’l consumu de medios de comunicación y productos culturales de los xóvenes de zones de fala catalana, podemos ver que, centrándonos namás qu’en Catalunya (nel País Valenciá y Illes Balears los datos son piores), únicamente pa un 5% de los que tán ente 14 y los 25 años taba en catalán l’últimu discu que mercaren, y pa solo 5’8 % el últimu conciertu al que fueren foi en catalán. Anque eso sí, los datos n’edaes más avanzaes son piores, colo que se puede pensar que la tendencia ye positiva, anque esto nun puede tapecer que la penetración de los productos culturales en catalán (llingua na que trabaya bien de los artistes catalenes) ye mui curtia. Si eso pasa en Catalunya, con una maquinaria trabayando dafechu pola cultura del país, que datos podemos topanos n’Asturies.

Comentaba n’otru artículu qu’habia que preparase n’Asturies pa los retos y cambeos que ta sufriendo la industria musical nel mundu. Pero esto va ser imposible si los que tán nello, na barricada, nun tiene un sofitu claro de les instituciones asturianes, que van dende’l Conceyu más pequeñu hasta el gobiernu del Principáu, consiguiendo d’esta manera que’l fechu de qu’haya una Folixa na Primavera nun seya prácticamente frutu de la casualidá, sinón de una estratexa asumida polo poderes públicos de dar puxu a la música y la cultura del país.