Laboral, despropositu del sedrá por perres

“Laboral”, esta pallabra suena muncho últimamente n’Asturies. Ye la marca del proyectu del Principáu d’Asturies de proyección d’arte de vanguardia, que se divide en dos estayes, Laboral Centro de Arte y Laboral Escena, lo que ye’l muséu y el teatru respectivamente. El nome suena muncho porque tanto’l Principáu como’l Conceyu de Xixón tán nuna carrera de promoción de “Laboral”, intentando dar a conocer que ye lo que se prentende p’atrayer públicu que xustifique la megainversión fecha nes instalaciones y personal. Pero’l nome Laboral suena tamién, y muncho, en boca d’aquellos que critiquen la política cultural del Principáu, apuntando directamente a esti proyectu personal del Presidente Areces, y el so escuderu en temes de comunicación Jorge Fernández León. Personalmente creo qu’hai que ver Laboral como un error en cuestión de dimensión y non de conceptu, ensin dexanos llevar por una crítica fácil a tolo que pare culturalmente’l Principáu.

Primero de nada vamos situanos. L’edificiu de la Universidá Llaboral, xunta colos sos edifcios adyacentes, tien namás y na menos que 270 000 m², tien a la so vera un hospital, un tanatoriu, un Centru Superior d’Artes Escéniques, un parque científicu-tecnolóxicu y un campus universitariu. Con too y con ello, ye un proyectu inacabáu, ya que’l diseñu orixinal del Luis Moya Blanco incluyía más edificios. La so construcción llevó 10 años (1946-56), convirtiéndose pal franquismu nuna bona publicidá pa la so política de partenalismu, amás de ser amuesa d’una pretendida prosperidá. Hai que dicir tamién que la construcción de La Laboral tamién ye conocida en Xixón como ñeru de despilfarru y pelotazu de munchos constructores, contratistes, proveedores y políticos, que ficieron munches perres turbies na so construcción. (Curiosamente esti ambiente de corrupción y cuentes estrañes con sobrecostes escandolosos repítese 60 años más tarde na construción del Muselón). El casu ye que col tiempu l’edificiu foi perdiendo puxu, y hasta va pocos años esta enormidá taba casi vacia, y prácticamente namás qu’agospiaba’l que yera l’institutu d’enseñanza secundaria más grande d’España.

Aquella situación resultaba bastante triste, y ver aquelles instalaciones ensin usar diendo a un deterioru claru yera daqué vergoñoso. Yera necesario facer daqué con elli, y ponelu al serviciu de la sociedá asturiana. Asina, tanto’l presidente Álvarez Areces como l’alma mater d’esti proyectu Jorge Fernández León, deciden crear un centru d’arte contenporaneu como mascarón de proa de la revitalización del centru, xunta con otres acciones adicionales como llevar ellí la sede la Radio Televisión del Principáu, la construcción d’un hotel de luxu y dar espaciu a empreses pa centros d’investigación.


Ye bien conocío que too esto llevó y lleva una inversión pergrande. Un datu revelador, el remocique del edificiu suponxo pel momentu 33,7 millones d’euros, qu’en 2007 foi’l 39 % de la inversión total que facía’l Principáu d’Asturies en Xixón. Viendo esti datu, tendría que pensase que tal inversión ta xustificada por una demanda clara, estudiada y socialmente aceptada d’unes instalaciones d’arte contemporanéu d’esti calibre. Pero nun fai falta ser sociologu pa decatase de qu’esto nun ye asina, qu’Asturies nun ye un país que rescample, polo menos non más qu’otros vecinos, en producción d’arte de vanguardia, nin la sociedá asturiana nin xixonesa tien cultura, tradición y costume de consumir esti tipu de productos culturales de manera importante. Y caro, con estes blimes esti cestu, ye dicir, lo que tenemos agora cuando les instalaciones lleven furrulando dalgo más d’un añu ye un espaciu infrautilizáu ya infravisitáu, daqué por otra parte esperable polo comentáu enantes. Laboral Escena, el teatru, con una caxa escénica de más de 24 metros de altura y 450 m2, y una capacidá pa casi 1.500 persones (dambes cirfes más que respetables), ta acoyendo espectáculos de corte mui vanguardista, les más de les veces minoritariu, que nun faen otro que rescamplar la total desproporción ente inversión ya instalacion y el so usu. Nel mesmu casu tamos col Centru d’Arte, que quitando en determinaes inauguraciones nun ta recibiendo tampoco un númberu de visitantes que xustifique los millones d’euros invertíos.

Y ye equí onde creo que ta’l centru de la cuestión, Laboral nun ye criticable porque se faiga un apueste pola promoción y espardimientu del arte de vanguardia, al revés, ye lo minoritariu lo que necesita de l’ayuda de les perres públiques pa dase a conocer y enriquecer el panorama cultural. El problema ye l’asoluta desproporción nesa ayuda, que lo que fae ver ye que nel Principáu nun hai idegues de qué facer cola cultura nesti país, y que ye muncho más fácil llanzase a la construcción de mausoleos inspiraos por visiones personalistes, que parase a facer una política planificada y coherente cola realidá d’Asturies, tanto social como cultural. Exemplu, va pocos años hebo en Xixón una movilización en defensa del Teatru Arango que diba pesllar definitivamente. Esti pieslle representaba la perda d’una instalación cultural de primer orde en plenu centru de Xixón. Daquella tanto’l Conceyu Xixón como’l Principáu nun quixeron escuchar a xente del teatru y de la música que plantegaba ideques pa qu’esti teatru nun acabara siendo lo que ye agora, una clínica d’estética. Dende’l Conceyu y dende Uviéu siempre se decía lo mesmo, nun yera viable económicamente, tenía que ser rentable. Pero agora paez ser qu’esi requisitu ya nun ye tan importante, y Laboral puede ser una instalación deficitaria ensin que naide s’esprecete. ¿Nun pudo ser interesante convertir aquel Arango nun centru d’esperimentación artística, pa dar espaciu propiu al arte de vanguardia en plenu centru de Xixón?, la inversión sedría infinitamenre menor. ¿Nun ye mui triste que les mesmes persones, por exemplu del teatru, que criticaben la desapaición del Arango, agora tengan que protester porque la programación de Laboral nun tien casi en cuenta a les compañíes asturianes?, ye dicir, primero piésllesme lo qu’hai y dempués esclúyesme de lo que faes nuevo.


Laboral ye un despropositu, una fuxida hacia delantre de persones que nun saben que facer coles perres, y que les malgasten en obres xigantes de perbón efectu mediáticu, pero dudosa y tovía por demostrar eficacia (vease’l Muselón). Jorge Fernández León y Álvarez Areces concibieron esti proyectu como si fuera la so cabera gran obra, igual qu’en Galicia ocurrió cola Cidade de Cultura de Santiago, bestialidá impulsada personalmente por Don Manuel Fraga y que tal paez que sirvió d’inspiración pa la Laboral. Critiquemos Laboral non pol conteníu, sinón pola so desconexón cola realidá social ya industria cultural asturiana, y pola descomanda ya inxustificada inversión de perres.