¿Había una burbuxa folk n’Asturies?

Tamos bien fartucos de sentir en tolos medios de comunicación, y en conversaciones de cai, el términu burbuxa, en referencia a la situación d’un determináu sector que vive un momentu perbonu, pero sofitáu en pegollos febles qu’albidren qu’en cualesquier momentu esa “burbuxa” va españar y fundir esi sector. Espurriendo un poco’l términu, y aprovechándome d’él pa llamar la vuestra atención, plantego esta entruga qu’entitula esta tribuna. Y ye que va tiempu que na escena folk ta detectándose una baxada nel númberu d’actuaciones, sobre too por culpa de la reducción de les nueches folk o celta, qu’hasta’l momentu yeren el coral de la vida en directo de los músicos asturianos.

Faciendo una encuesta rápida ente los músicos de grupos de más sona, los más d’ellos cuenten que, por poner un casu esti mesmu branu, hai una baxada bultable del númberu de bolos, que confirma una tendencia que vien d’años anteriores. Nin que dicir tien qu’hailos que tienen la temporada de conciertos dalgo más animada, pero nótase una quexa xeneral, que se centra principalmente, y que tien la so causa principal, na baxada de nueche folk que s’entamen. Y ye qu’hasta va unos años a lo llargo del branu yera raru’l fin de selmana que nun había 2 ó 3 nueches folk, coincidiendo dacuando varies la mesma nueche. Ye más, los carteles de les nueches folk llegaben a paecese muncho, repitiéndose los grupos d’un conciertu a otru faciendo incluso que munchos grupos tuvieren que facer doblete la mesma nueche y tocar en dos sitios. Podría dicise qu’aquella yera dómina de vaques gordes, pero tengo pa min que más bien yera una ilusión qu’una vegada más nun se supo aprovechar pa poner pegollos pal futuru. Nun yera normal nin sostenible que cada vegada que vieres un cartel de la nueche celta de turnu taben casi los mesmos nomes repetíos una y otra vegada, nun yera normal carteles de 5 ó 6 grupos p’acabar tocando al amanecerín, nun yera lóxico eses condiciones pa los músicos con prebes de soníu a les 4 la tarde pa tocar a les 3 de la mañana…etc. Ye dicir, un despropositu. Y nun se trata de qu’agora haya que renegar de tolo qu’aportaron les nueches celtes a la escena folk. Anguaño cúmplense 25 años de la primer nueche folk, la de Corao en 1983, y d’entós p’acá milenta nueches sirvieron pa visualizar, normalizar y crear comunidá nel folk asturianu. Pero col tiempu les coses cambien y nun se puede siguir con formatos que funcionaben el sieglu pasáu.

Creo que se pueden identificar dalgunes de les causes que llevó a la baxada nel númberu de nueches folk. Ún de los sos principales problemes ye que taben y tán organizaes munches veces por asociaciones o comisiones de fiestes, qu’arriesgaben los sos presupuestos apostando por esti formatu. Les más de les veces los eventos nun llegaben a ser rentables, a poder polo menos autofinanciase, faciendo qu’énte’l más mínimu imprevistu económicu, o que simplemente lloviere, el descalabru financieru facía imposible volver a entamar el festival. Amás d’esto, los propios músicos fartuquen d’un formatu que los maltrata, per una llau’l mesmu día del conciertu con esperes interminables ensin sitiu onde descansar, p’acabar tocando a altes hores munches vegaes con un soníu horrible, y finalmente cobrando a los 6 meses. Amás creo que’l propiu públicu dio en parte la espalda a les nueches folk porque tamién ye un modelu que lu maltrata, mal soníu, bebida cara y/o mala, esperes ente grupu y grupu desesperantes…etc. Arriendes de too esto, el folk en si nun ta nel meyor momentu comercial. Va unos años coincidieron varios fenómenos que tiraron pola música folk, Hevia, Kepa Junquera, Carlos Núñez, Luar na Lubre…etc, estos nomes y otros punxeron de moda’l folk, qu’ayudó a los grupos asturianos a xubise a la fola. Esto agora nun ta pasando, la música de raigañu, folk o de reellaboración nun ta nes llistes de ventes, nin equí nin en nengún sitiu.


¿Soluciones?, o polo menos, ¿qué futuru-y espera a too esto?. Evidentemente nun ye fácil de dicir. La coyuntura nun ye la meyor, pero se puede intentar poner enriba la mesa ciertes idegues pa nun volver cayer nos errores anteriores. Pa entamar, primero de nada y como siempre, facer que’l Principáu asuma d’una vegada la so responsabilidá como potenciador de la música asturiana en toles sos facetes, incluyíu’l folk, y nesti casu en concreto, facilitando con subvenciones, entamando y promocionando la música folk en directo. Eso sí, desixendo siempre unes condiciones dignes pa tocar que los músicos tán cansos d’enumerar. Arriendes d’esto, los grupos tamién tienen que decatase de que hai qu’enanchar los horizontes, y per aciu d’un trabayu bonu de management, acceder al circuitu de conciertos folk del estáu español y Portugal, onde los grupos asturianos tán casi inéditos, lo que los ayudaría a aumentar el numberu d’actuaciones al añu. Tamién se podría apostar por integrar les nueches folk nos programes de les fiestes de los pueblos, dalgo qu’ayudaría a aforrar costes –por exemplu l’escenariu nun se pondría solo pal folk-, arriendes de facer llegar la música a xente que nun diría espresamente a una nueche celta. Al tiempu, se puede crear festivales con plantegamientos más amplios que’l musical namás, p’atrayer a un tipu de públicu los más heteroxeneu posible.

Nun hai que renunciar a les nueches folk, hai que les refacer pa que tol mundu pueda tar más agusto. Hai músicos que renegaron d’elles, con parte de razón, pero nun hai qu’escaecer que gracies a elles, a la música en directo, foi como’l folk algamó n’Asturies lo qu’hai güei.