Música asturiana nel Spotify

Nel añu 2009 apaeció un proyectu on-line que revolucionó y ta revolucionando'l mundu de la música y la so rellación con internet, rellación polémica onde les haya. Ye Spotify, que p'aquellos que tovía nun la conozan, ye una aplicación pa sentir música vía streaming, en directo. L'usuariu namás que tien que buscar el cantar que quier sentir y calcar nel play, sin falta d'esperar a descargar l'archivu.

Spotify ye daqué realmente recomendable, pon a nuestra disposición una cantidá de música increible, anque la fondura del catálogu depende de qu’opción escoyamos, ya qu’hai versión gratuita y premium. Na opción de baldre nun se tien accesu al catálogu completu de música, y amás hai publicidá ente los cantares, mientres que la premium lóxicamente ta llibre d'anuncios y da accesu a tol fondu musical. En resume, ye una ferramienta qu'intenta adaptar el negociu de la música al mundu on-line.

Pero, ¿cómo puede afectar a la música asturiana, puede sirvi-y de canal pa difundise, o al reves, puede tapecer la nuestra música?. Si facemos una busca rápida na versión free de grupos asturianos, los resultaos pueden ayudanos a danos una rempuesta. Si buscamos en Spotify artistes como Felpeyu, DRD, La Bandina, Llan de Cubel, Dixebra, Toli Morilla, Mª Luz Cristobal Caunedo, Los Berrones, Fe de Ratas, Helltrip o Skanda por poner unos exemplos, el buscador déxanos como tabemos, con nada. Y ye que nun hai nengún cantar de nengún d’estos grupos nel catálogu. Nun quier dicir esto que nun haya música asturiana na web, pero como se puede ver, una parte perimportante de la música asturiana nun existe pa Spotify. Nun sé si esto ye tamién asina na versión premiun, pero calculo que sí, y per otra parte, la versión de baldre ye la más usada de manera aplastante. Esto quier dicir que bona parte del discursu musical asturianu ta fuera d’una de les ferramientes de difusión de la música más prometedores de los últimos años, y eso ye, evidentemente, pernegativu. Si la popularización de Spotify sigue medrando, y entamase a convertise pa una parte relevante de la sociedá na principal canal pela qu’acceder a música, toos esos grupos sedríen invisibles p’aquellos que quixeren interesase pola música que se fai per este tierres.

Spotify igua’l so catálogu per aciu d’acuerdos con discográfiques, que ceden el so fondu a cambiu de retribuciones por ventes de cantares. Probablemente nenguna discográfica asturiana contactó entá cola empresa pa intentar meter los sos discos na web, y esto ye normal, ya que Spotify namás que lleva añu y mediu funcionando. Pero, los músicos y discográfiques asturianes nun puede dexar pasar la oportunidá de tar dientro de fenómenos como esti, ya que ye una inmeyorable ferramienta pa difundir el so trabayu. Dir colos tiempos nun ye namás una obligación, sinón tamién una oportunidá.